قصـة الطفل حمود :(

مرحبا صبايا .. كيفكم و كيف الصيام معكم ..؟ 

جبتلكو قصه لـ طفل اسمو احمد من غزة وانا حبيتها و حبيت انو تقرئوها ..

راح انزل الجزء ١ ازا حبيتوها بكفيها ماشي 
 
- - - - - - - - - - - -

 الجزء الأول 
كان علي خبرك الصاعقة لما عرفت انو ماما حامل !!!

كنت ف توجيهي ولازم اركز في دراستي مش ف شي تاني ،،

بس ماما وقفت عن الانجاب من زمان ، وانا اكبر اخوتي والي 3 اخوه شباب اصغرهم عمرو 15 سنه وانا البنت الوحيده بينهم ، هلأ جاية ماما تحمل ، كرهت حالي وشفت الدنيا سودة بوجهي ،،

وقلبت الدار عنا متل العزا والكل معصب وزعلان حتى ماما نفسها بس شو بدنا نعمل ،
هاد قضاء الله ، بديت اخد الأمر ببساطة اكتر وانسى ،

واهتم بدراستي وفعلا قدمت امتحانات وتفوقت وطلعت نتيجتي ممتازة الحمد لله وسجلت في الجامعه ،

كان يوم متعب من أول يوم الي بالجامعة ، واول مرة اعيش جو الجامعه والتنقل بين المباني والمحاضرات ، اخر اليوم وانا ماشية مع صحباتي يلي بعرفهم من المدرسة وطالعين من الجامعه ،،

اتصل فيي أخـي يلي اصغر مني بسنة ..

اهاااااااااااا

كملي القصة

حلو كتير 
يلا كملى

حلو كتيير كمليها يلا

انتو الاحلا .. نورتوا 


( الجزء الثاني )

محمد : آلو مرحبا
أنا : هلا محمد
محمد : اسمعي إمي راحت ع المستشفى لتولد !
أنا : ممم اوك هيني مروحة
روحت ووصلت البيت ، كان بابا مروح من عند ماما من المستشفى
فتت البيت

أنا : مرحبا
بابا : هلا وهو مبسوط
انا : شو وين ماما ؟
بابا : لسا ف المستشفى هي والبيبي
أنا : اها اوك

وفتت غرفتي ، وانا بحاكي حالي ، كان ناقصنا خلفة وتعب بال احنا
وغيرت ملابسي وطلعت من الغرفة
الا ماما وخالتو بفوتو البيت ومعهم البيبي ، وفاتو الغرفة
لحئتهم ، خالتو نادت علي وقالتلي احملي اخوكي
انا حملتو وطلعت فيه كان ابيض كتيييير وشعراتو شئر وبجنن ، دايما المولودين جديد بكون لونهم احمر ومش مبينه ملامحهم وهاد الشي الطبيعي ، بس هو كان بجنن واول ما طلعت فيه ابتسم وهو مغمض عيونو ، لدرجة انو الكل انصدم وتجمع عليه ، اول ما ابتسم حسيتو انزرع بئلبي من جوا ، حسيت حبو انغرس بئلبي بلحظة
بستو من خدو واعطيتو لخالتو وفتت احضر البيت لاستقبال الناس يلي بتهنينا
بعد شوي بابا ناداني

رحتلو ،
بابا ئال : ايمان انا بدي ياكي انتي اللي تسميه
انا انصدمت انا ؟
بابا : آه انتي
أنا وبدون تفكير ئلت مم : أحمد
سموه احمد
وفعلا بابا سماه احمد
مرت الايام واحمد يكبر وحبو يكبر بقلبي ، وكنت دايما ادلعو واناديه حمود !

الجــزء الثـآلث ..  #

كان احمد متعلئ فيي اكتر من اي حد تاني ، كنت احبو بشكل مجنون ، لدرجة اني استغرب من حالي كيف كنت كرهانة جيتو ع البيت وكيف صرت احبو
وكل البيت بحبو ، كان دلوع الكل ، بس كان بالنسبة الي شي خاص
ونا قاعده ع الاكل بيوم
اجا احمد بعد ما صار عمرو سنه وشهور وبدا يخربلي بالاكل ويضرب فيي ويضحك كالعادة
وانا العب معو ، ئرب مني وسكب العصير فوقي وع الاكل
عصبت ماما ، وكانت حتصرخ عليه
بس انا حملتو وقلتلها لا مش مشكلة حملتو وبستو ونضفت المكان ورجعت قعدت وماما بتطلع فيي وبتضحك
كتير مواقف صارت بيني وبين احمد اللي كان متل ظلي وما يفارقني
ولما كبر شوي وصار سنتين ونص ، صرت اول ما اروح من الجامعه يستقبلني وانا طبعا معي كل اللي نفسو فيه احملو والاعبو قبل ما اغير ملابسي ، وماما تحكيلي
: وبعدين رح تخربيه بدلعك ، ع الاقل ارتاحي اول
اقلها : لا حمود اول وبعدين الدنيا كلها
و بس كبر شوي بلش يكره يشوفني مشغولة بشي غيرو حتى الدراسة، وكان دايما يطل علي من طرف باب الغرفة ويضحكلي بدو ياني الحئو والاعبو
واحيانا ينادي علي بصوتو الناعم : إيمان اتي هبلة ويهرب وهو بضحك ضحكتو المجنونه ،مشان الحئو واترك دراستي ، كنت اضحك من تصرفاتو كتير
كبر حمود و كل ما يكبر يحلى ، والكل كان يشبهنا ع بعض بس انا دايما كنت اوقف واقول لا حمود احلى مني اكيد
كان احمد ابيض كتير وشعراتو نااعمين وعيونو بنية ووااسعه وضحكتو بتاخد العقل ، وقلبي يوم عن يوم بتعلق فيه وبحبو اكتر

حلوووووووووة..وآآآصــليي شوووقتييييينــآآ..:لاع:

حلووه كتيير مششكووؤؤرة قلبووو ~وااصلي القصة حلووه كتيييير ~ واناا بتاابعك للنهااية ~كتييير متحمسسسه

يلاااااااااااااااااااااااااااااااااا كملي

حمااااااااااااااااااااااااااااااااااااااااااااااااااااااااااااااااااااااااااااااااس

 كمــــــــــــــــلـــــي حـــــــــــــــــــلآآووووووووي....يــــــــــــــــــــــــــــلآآلآآآ....:9999: :9999:

منورين .. 



 # الجزء الرابع

في نهاية الــ2012 صار حمود عمرو 3 سنوات وفي يوم وبعد ما روحت من الجامعه فتت البيت تعبانه وفتت غرفتي لقيتها مكسرة وما في شي مكانو وحضرة حمود قاعد ف نص الغرفة وبكمل تخريب

كنت مروحة معصبة وتعبانه ولما شفت منظر غرفتي عصبت بزيادة ومسكت ايدو وضربتو لخليتو يبكي وطلع من الغرفة وكانت اول مرة بضربو فيها

سكرت باب غرفتي وبدلت ملابسي ورتبت غرفتي ونا معصبة منو
بعد ما خلصت فتحت باب غرفتي لاطلع ، لقيت حمود واقف ع الباب
وببكي ، طلعت فيه بعصبية ، ودموعه بعيونو ئلي : إيمان انا اثف

قلتلو : لا ما بدي احبك خلص حمود يلي بكسر غرفتي مش حبيبي وتركتو ومشيت ،

قعدت اتغدا وكان الوقت بعد العصر بساعة ونص تقريبا ، بعد ما خلصت غدا قمت اتطلع ع التلفزيون وكان الوضع عنا ف غزة متوتر بعد اغتيال قائد كتائب القسام ابو محمد الجعبري
وفجأة و انا بتفرج ع التي في بلشت الانفجارات وبشكل رهيب وصار الصوت يهز البيت هزز ، جري حمود علي بسرعه وهو بصرخ حضتنوو بقوة

وقلتلو ما تخاف حبيبي ، كان حمود لسا مش متعود ع صوت القصف لانو من عمرو ما صار قصف بشدة بعد حرب ال2008 ، كانت الانفجارات متوالية وقووية كتير ، بابا اجا بسرعه واخوتي كمان ، واخي محمد برا البيت متأخر بجامعتو
اتصلت عليه وانا حاملة حمود

هههههه  .. انتي الاروع 
 

الجزء الخامس ..# 

أنا : الو محمد وينك ؟
محمد وصوتو كانو بجري ومقطوع نفسو : هيني ف الطريق وفش سيارات الكل بشرد

أنا : طيب بسرعه لا تطول كلنا خايفين عليك .

محمد : أوك مش مطول وأصل البيت
وسكر التلفون

في هاي اللحظة استمر القصف فتحت شباك غرفتي شفت الدخان من كل مكان بطلع والناس بتصرخ وبتجري في الشوارع ، ادركت انها الحرب ، فعلا هي الحرب بدت من جديد
كنت سرحانه وبطلع لقيت حمود بحسس ع خدي بايدو
طلعت فيه ، صار يقلي وهو برجف : إيمان اتي سامحتي انا عسان كسرت اشيائك

ما بعرف شو حسيت بقلبي ساعتها : ابتسمتلو وقتلتو :آه يا حبيبي سامحتك
وحضتنو بقوة

باسني من خدي وقلي : إيمان حبت انا "بحبك انا "
وضم خدو ع وجهي حسيت باحساس غريب بس حاولت اطنشو
قلتلو ونا بحبك يا ئلبي

وما في شوية حتى اجا محمد واطمن قلبي انو الكل في البيت وما حدا برا ، قعدنا في الصالون ، الا صوت صاروخ نزل وانفجار قوي

طلعنا من الشباك طلع الصاروخ نازل في بيت جيراننا ، صرخنا وخفنا كتير ، بس طلعو جيراننا طالعين من البيت وما صار شي فيهم ، خاصة انو صاروخ من طيارة استطلاع وما بعمل اضرار كبيرة

فاضل جزئين بس :)

يـــــــــــــــــــــــــلآآآ متــآآبعتككــ أنـــــــــــآآ..:1qw: :1qw:

يلاااااااااااااااااااااااااااااااااا حمستينا

الجزء السادس ..# 


بدينا نحس بالخوف ،
واجى الليل وبلش القصف يزيد ويزيد

وحمود ما بفارقني وطول الوقت بحضني ، في اليوم الخامس من الحرب وبعد ما صار القصف شي طبيعي وصوتو مألوف بالنسبة النا ، الا بالنسبة لحمود اللي كان يركض علي وهو يصرخ كل ما يسمع صوت قصف ؛ وانا احضنو واهديه

كانت الساعه 3:30 قبل العصر لما كنت انا ف غرفتي ، وحمود ف الصالة بلعب في العابو

لما صار انفجار هزز البيت بقووة كبيرة وكأنو ف البيت ،

طلعت اجري من غرفتي ، لقيت كل اهلي طالعين يجرو وزجاج البيت كلو تكسر من قوة الانفجار ،

وحمود عند العابو نايم ، ماما حملتو ، اخدتو انا منها وقلت ف عقلي : الحمد لله انو ما صحي

وانا مستغربة انو نايم في كل هالصوت وحملتو ، وصار بابا يصرخ علينا انزلو انزلوو ، القصف جنبنا
وفعلا نزلنا بسرعه ، ولاحظت انو اخي اسامه ايدو عليها دم ،

صرخت عليه قلي ما تخافي بسيطة وسطحية وفات بالاسعاف وراح ،

ورحنا كملنا نجري انا وماما واخوتي وسط الدخان وانا حاملة حمود وضاماه بقوة ،

ورحنا لبيت عمو وهو قريب منا بس ابعد عن القصف ،

بعد ما وصلناه وهديت وقعدت ،

انتبهت اني مش حاسة في نفس حمود ، مش حاساه بتنفس ، قلبي دق طلعت ف حمود وانا حاملاه ،

انصعقت ، في بقعة دم ع صدرو ،ما لاحظتها من قبل !! لا مش معقول
صررخت باعلى صووت عندي ، ماماااا حمود عليييـه دم ، ماماااا

كمـــــــــــللي..بســــــرررررعة:1qw: :1qw:

سوري بنات هاد الجزء يلي قبل الاخير .. 

الجزء السابع ..# 

ماما صارت تصرخ وتبكي واخدتو مني وبابا اخدو منها وراح يجري ، حطوه ف الاسعاف وانا واقفة مصدومة ؛ تزكرت كل همسة منو كل ضحكة كل كلمة مر شريط ذكرياتو قدام عيوني ف لحظات

قعدت وانا ابكي وادعي ياا رب ياا رب ، بعد شوي اجت مرت عمي وحكتلي ما تخافي حمود بخير بس اصابة سطحية ، تطلعت فيها ومش عارفة شو اللي بقلبي قلي كذابة مستحيل ، بس طمنت حالي وصرت اقول اكيد حمود بخير

وبعد نص ساعه
جوالي برن
هاي دعاء اعز صحباتي

دعاء : الو حبيبتي وهي بتبكييي

انا : الو ، دعاء ليش بتبكي
سكتت دعاء ، وحسيت قلبي انقبض بقوة
وصررخت دعاااء شوو فيه ؟
الجوال طفى ما في ارسال

ياا ربي شووو فيه وبلشت ابكيي
اتصل بابا بعد شوي ب ماما
اخدت الجوال منها
ورديت

انا : الو بابا

الجــزء الثامن والأخير :( 

كان حامل حمود بين ايديه ،كان ملفوف بالابيض والدم مغطيه
و مبتسم هديك الابتسامه يلي ابتسمها الي يوم ما انولد !
وقفت زي المجنونة اطلع معقوول ، معقول ، حمود راح ، ما عاد يرجع ، معقول
هجمت ع بابا ونا بصرخ
وخطفتو من ايد بابا وضميييتووو بقوة ، حطيت وجهي ع خدوو ، بااررد وعيونو مغمضة والدم ع وجهو ، طلعت فيه كتييرر
ورجعت ضميتوو
ليش يا حمود ليش ؟
ليش ي حبيبي تركتني ، معقول ، لحقت تزهق من هالدنيا بسرعه ، معقول زهقت من ايمان يلي بتحبك ، زهقت من حضنها ونتا عايش لتيجي تنام فيه وانتا ميت !

زاكر لما ضحكتلي اول مرة قبل ما عيونك تفتح ع الدنيا ، زاكر لما كبرت وكنت تستنى ايمان لتروح وتجيبلك الحاجات
زاكر لما كنت تناديني وتجري علي بس تشوفني وتترك العابك وتنام ف حضني ،
زاكر لما ضربتك مشان خربتلي غرفتي ، يا ريت خربتلي دنيتي وضليت موجود
زاكر لما مسحت ع ايدي وقلتلي : اتي سامحتي انا؟؟؟
اي سامحتك ، سامحتك يا روحي سامحتك حبيبي ، بس انتا سامحني

زاكر لما وقفت ع باب غرفتي تبكي وتقلي : سامحيني ايمان اثف
ومشيت وتركتك حبيبي ساامحني ، سامحني يا وجعي
سامحني لأني ما قدرت امنع الموت عنك ، سامحني لاني تركت الشظية تدخل لقلبك الصغير اللي ما عرف معنى الحياه ، سامحني انو حضني ما قدر يحميك من الموت وحقد خطفك مني وراح
زاكر لما ضميتني وقلتلي "بحبت ايمان " وانا بحبك ، بحبك بس هما ما حبوك قتلوك ، قتلو ضحكتك وكلماتك المقطعه وصوتك الناعم ومشاكستك ، قتلوك وقتلو كل شي حلو في دنيتي

حمود صارلك 7 شهور غايب عني وصورتك ما بتفارق عقلي ، اشتقتلك حبيبي
اشتقت لضحكاتك ، لمشاكستك ، ولكلامك يلي كنت ما افهم منو الا القليل ، وكشرتك اللي كنت اعشقها ، اشتقت اروح من الجامعه وتجري علي بسسرعه وتحضني وتسالني : وين الحاجة ؟
اشتقت لصوتك وانتا بتقلي احكيلي قصة يا ايمان !
اشتقت حبيبي اشتقت كتيييـر
حمود انتا عايش ، انتا ما متت عايش بقلبي
صدقني عمرك ما متت ولا رح تموت
واليوم بحكي قصتك للعالم ، بحكي قصة ألمي ووجعي ومووتي عشرات المرات كل يوم
قصة رووحي يلي طلعت منـي ، قصة ووجع بقلبـي رح يضل عايش فيي ليوم موتي

حبيبي احجزلي مكان جنبك ف الجنة يا حمود ما تنسى حبيبي
بحبك يا روحي
اختك : إيمان
انتهت ..

يلي بكيت متلي تعترف 


و شو رايكم بـ القصه .؟!

:اتاه: :اتاه: :اتاه:

اناااااااااااااااااااااااااااااااااااا :اتاه: :اتاه: :اتاه:

يسلــــــــــــــــــــــــــموووو حلااااااااااوووووي من صددددق رووووووعــــــــــــــــــــــــة...
نهاايـــة حزيـــنــــــــــــــة <<:اتاه: :اتاه: :اتاه: :اتاه: :اتاه:

:اتاه: :اتاه: :اتاه: